Biznesmeni Behgjet Pacolli ka bërë të ditur se ka dalë fitues në përplasjen ligjore me ish-ortakun e tij, Valon Ademi, lidhur me operimin e Vlora International Airport. Ademi e kishte paditur Pacollin në Gjykatën e Tiranës, duke pretenduar se kishte të drejta mbi një pjesë të aksioneve të aeroportit.

Në një postim në rrjetet sociale, Pacolli deklaron se nga dita e djeshme aeroporti i Vlorës i është rikthyer “normalitetit institucional dhe rendit ligjor”, pas pezullimit të mëparshëm të aksioneve nga Prokuroria e Tiranës. Ai thekson se operimi i aeroportit do të vijojë normalisht, duke nënkuptuar se drejtësia ka vendosur në favor të tij në konfliktin me ish-ortakun.

Konflikti mes Pacollit dhe Ademit ishte në qendër të vëmendjes publike dhe mediatike për muaj me radhë. Pacolli zotëronte 98% të aksioneve, ndërsa Ademi pretendonte se investimet dhe marrëveshjet e tij e çonin në një kuotë prej 49%.

“Po kthehet normaliteti me aeroportin e Vlorës! Akti më i lartë i përgjegjësisë qytetare dhe patriotike është kontributi ndaj familjes, shoqërisë dhe shtetit përmes punës së ndershme, profesionale dhe respektimit të parimeve të drejtësisë… Nga sot, në Vlora International Airport, rikthehen normaliteti institucional, rendi ligjor dhe besimi,” shkruan Pacolli.