Në kuadër të operacionit policor të koduar “Livadhet”, efektivët e Shkodrës kanë vënë në pranga Seid Curraj, 25 vjeç, ndërsa B. B., 39 vjeç, shpallet në kërkim.

Operacioni u realizua nga Sektori për Hetimin e Krimeve të Rënda Shkodër, në bashkëpunim me Komisariatin e Policisë Shkodër, Forcat e Posaçme Shqiponja dhe Forcën Kombëtare të Sigurisë, pas informacionit për vendndodhjen e të dyshuarve.

Curraj ishte shpallur në kërkim, pasi Gjykata e Shkallës së Parë Shkodër i kishte caktuar masën e sigurisë “Arrest në burg” për veprat penale:
• Vjedhje e kryer në bashkëpunim
• Mbajtje pa leje dhe prodhimi i armëve, armëve shpërthyese dhe municioneve
• Prodhim dhe shitje të narkotikëve

Gjatë kontrollit në Livadhet e Kirasit, lagj. “Guerile”, policia sekuestroi:
• 1 armë zjarri automatike dhe municion luftarak
• Një sasi lënde narkotike kanabis
• Automjet tip “Toyota Hilux” pa targa, i vjedhur në Durrës dhe i fshehur rreth 100 metra larg

Puna për kapjen e shtetasit B. B. vazhdon, ndërsa materialet procedurale iu referuan Prokurorisë së Shkodrës për veprime të mëtejshme.