Një ngjarje e rëndë është regjistruar në fshatin Novoselë të Vlorës, ku një 42-vjeçar ka humbur jetën gjatë një loje kalçetoje.

Sipas njoftimit zyrtar të Policisë, ngjarja ka ndodhur më 25 dhjetor 2025, në ambientet e kalçetos së fshatit. Shtetasi B. R., 42 vjeç, banues në Vlorë dhe rezident në Gjermani, është goditur nga topi në pjesën e kraharorit gjatë lojës së futbollit, moment në të cilin është rrëzuar në fushë.

Menjëherë pas incidentit, 42-vjeçari është transportuar drejt spitalit të Vlorës, por fatkeqësisht ka ndërruar jetë gjatë rrugës.

Nga veprimet e para hetimore, uniformat blu dyshojnë se viktima ka pësuar një atak kardiak. Policia ka referuar materialet për vlerësim të mëtejshëm, ndërsa pritet ekspertiza mjeko-ligjore për të sqaruar plotësisht shkaqet e humbjes së jetës.