Yll Limani ishte i ftuar në emisionin “Ndryshe”, në një intervistë ekskluzive për Top Albania Radio, ku artisti ndau detaje të shumta jo vetëm mbi muzikën dhe albumin e tij më të ri, por edhe mbi jetën personale dhe marrëdhëniet. Këngëtari u shfaq i hapur dhe i drejtpërdrejtë, duke mos u rezervuar aspak në përgjigjet e tij.

Që në nisje të intervistës, Limani ndaloi te një detaj që, sipas tij, ndodh shpesh në Shqipëri: ngatërrimi i emrit të tij. Artisti sqaroi se emri i tij i vërtetë nuk është “Ylli”, por “Yll”.

“Emrin Ylli nuk ma kanë vendosur kurrë. Unë e kam Yll, vetëm Yll pa ‘i’. Gjithmonë në Shqipëri e thoni Ylli Limani. Gjithë kohën më keni prezantuar gabim. Edhe kur shkoj në ndonjë event e shikoj nga pas aty ‘Ylli Limani’ dhe them gjithmonë: është Yll, pa ‘i’”, u shpreh këngëtari.

I pyetur se çfarë mendon se e dallon Yll Limanin nga artistët e tjerë, ai u përgjigj me modesti, duke theksuar se nuk i pëlqen të flasë për veten në kuptimin lavdërues të fjalës.

“Nuk e di, kam qenë gjithmonë ndoshta më specifik. Të gjithë njerëzit stinën e vjeshtës, shiun, të ftohtin, i kanë lidhur me Yllin, me këngët e mia, me albumin tim”, tha ai.

Sipas artistit, dallimi mund të qëndrojë te tekstet apo te ngjyra e zërit, të cilën ai nuk e sheh si meritë personale.

“Ndoshta tekstet, ndoshta ngjyra e zërit që është meritë e Zotit, nuk është e imja. Unë vetëm kam ditur ta përdor, mendoj. Është meritë edhe e prindërve të mi”, përfundoi Yll Limani.

Intervista solli një portret më personal të artistit, duke treguar jo vetëm anën muzikore, por edhe mënyrën se si ai e percepton veten dhe identitetin e tij artistik.