Alkooli është një nga faktorët kryesorë të rrezikut për shëndetin publik në Evropë, duke u lidhur me një në tre vdekje nga lëndimet dhe dhuna, sipas raportit më të fundit të Organizatës Botërore të Shëndetësisë (OBSH). Sipas të dhënave të vitit 2019, rreth 145 mijë vdekje në rajon i atribuohen konsumit të alkoolit, përfshirë vetëlëndimet, aksidentet rrugore dhe rrëzimet.

“Asnjë substancë tjetër psikoaktive nuk kontribuon kaq shumë në lëndimet e qëllimshme dhe të paqëllimshme,” paralajmëroi OBSH-ja, duke theksuar se alkooli mbetet veçanërisht i rrezikshëm për të rinjtë.

Raporti vëren gjithashtu se Evropa ka nivelet më të larta të konsumit të alkoolit në botë, me rreth 800 mijë vdekje çdo vit që lidhen me përdorimin e tij – një në çdo 11 vdekje. OBSH-ja thekson rëndësinë e masave parandaluese, sidomos gjatë periudhave festive kur konsumi i alkoolit rritet dukshëm.