Gjermania po përballet me një valë të fortë të ftohti, me temperatura tejet të ulëta dhe rrugë të mbuluara nga akulli në shumë rajone të vendit. Mediat e huaja raportojnë se, ndonëse për shumicën e gjermanëve nuk u realizua dëshira për një “Krishtlindje të Bardhë”, moti i acartë ka sjellë pasoja të shumta në qarkullim dhe shëndetësi.

Sipas Shërbimit Meteorologjik Gjerman (DWD), Krishtlindjet e vitit 2025 kanë qenë më të ftohtat që nga viti 2010. Periudha nga 24 deri më 26 dhjetor rezultoi mesatarisht më e ftohta e 15 viteve të fundit në shkallë vendi.

Temperatura më e ulët u regjistrua natën e 26 dhjetorit, kur termometri shënoi -12.1 gradë Celsius në Malet Harz, konkretisht në Harzgerode, në landin e Saksonisë-Anhalt. Ndërkohë, një Krishtlindje me borë u përjetua vetëm në disa zona të izoluara, kryesisht në jug të vendit. Reshje të lehta dëbore u raportuan në disa rajone të Bavarisë, ndërsa sasi të konsiderueshme dëbore u regjistruan vetëm në zonat alpine: 75 centimetra në Zugspitze dhe 80 centimetra në Nebelhorn.

Akulli ka shkaktuar probleme serioze në qarkullim, veçanërisht në Gjermaninë veriore, ku janë shënuar dhjetëra aksidente për shkak të rrugëve të rrëshqitshme. Situata ka qenë e ngjashme edhe në Berlin dhe Brandenburg, ku autoritetet u detyruan të ndërpresin përkohësisht shërbimin e autobusëve në Potsdam.

Ndërkohë, sistemi shëndetësor po përballet me presion të shtuar. Gazeta Tagesspiegel raporton se që nga mbrëmja e së shtunës, repartet e urgjencës në disa spitale të Berlinit janë mbingarkuar. Rëniet në trotuare dhe rrugë të mbuluara me akull kanë sjellë fluks të madh pacientësh, kryesisht me thyerje të krahëve dhe këmbëve, si dhe lëndime në kokë.

Sipas spitaleve, edhe sallat e operacionit dhe njësitë e kujdesit intensiv janë pranë kapacitetit maksimal, ndërsa koha e pritjes për trajtim është rritur ndjeshëm. Autoritetet u kanë bërë thirrje qytetarëve të tregojnë kujdes maksimal, të shmangin lëvizjet e panevojshme dhe të respektojnë udhëzimet e sigurisë gjatë ditëve me ngrica.