Vetëm një ditë pas takimit të presidentit amerikan Donald Trump me homologun ukrainas Volodymyr Zelensky, ministri i Jashtëm rus, Sergey Lavrov, ka akuzuar Ukrainën për një sulm ndaj një prej rezidencave kryesore të presidentit Vladimir Putin. Sipas Lavrovit, Ukraina ka përdorur 91 dronë luftarakë me rreze të gjatë, të cilët, sipas tij, janë shkatërruar, ndërsa objektiva të mundshme për një kundërsulm janë tashmë identifikuar.

Ukraina ka mohuar menjëherë akuzat, duke i quajtur “gënjeshtra” dhe duke theksuar se Rusia po përpiqet të minojë përparimin e bisedimeve me SHBA-në. Presidenti Zelensky paralajmëroi se Moska mund të planifikojë sulme ndaj ndërtesave qeveritare në Kiev dhe kërkoi reagimin e menjëhershëm të Shteteve të Bashkuara.

Rezidenca në fjalë ndodhet në Waldai, një kompleks i madh sekret në rajonin e Novgorodit, midis Moskës dhe Shën Petersburgut. Kompleksi përfshin një qendër konferencash, rezidencë shtetërore, banesa për mysafirë dhe një rezidencë familjare luksoze me park argëtimi, pistë kartingu, helipadë dhe bunkerë. Sipas raporteve jozyrtare, aty jeton edhe një pjesë e fshehtë e familjes së Putinit, përfshirë ish-gjimnasten Alina Kabajeva dhe dy fëmijët e tij.

Analistët ushtarakë e konsiderojnë sulmin ndaj Waldait pothuajse të pamundur, duke e vlerësuar kompleksin si më të mbrojtur se Kremlini, pasi Putini ndodhet më shpesh atje sesa në zyrën e tij në Moskë. Lavrov, megjithatë, e ka përshkruar sulmin si një “akt terrorist” dhe ka këmbëngulur se Ukraina është përgjegjëse për kërcënimin.