Një ngjarje e rëndë është raportuar ditën e Vitit të Ri në Shtetet e Bashkuara. Vajza e aktorit të njohur dhe fitues të çmimit “Oscar”, Tommy Lee Jones, është gjetur e vdekur në një hotel luksoz në San Francisko.

Sipas mediave amerikane, bëhet fjalë për 34-vjeçaren Victoria Jones, e cila u shpall e vdekur në orët e para të mëngjesit të 1 janarit, në katin e 14-të të hotelit “Fairmont”. Një mysafir i hotelit e ka parë fillimisht të shtrirë dhe ka menduar se ajo ishte në gjendje të dehur, përpara se të njoftonte stafin dhe shërbimet e emergjencës.

Ekipet mjekësore mbërritën në vendngjarje rreth orës 02:52, por e reja u gjet pa ndjenja dhe pa shenja jete. Autoritetet kanë bërë të ditur se, deri në këto momente, shkaku i vdekjes mbetet i panjohur.

Burime pranë hetimit sqarojnë se nuk janë konstatuar shenja dhune apo indicie që të çojnë drejt një akti vetëvrasjeje, ndërsa rrethanat e plota të ngjarjes janë ende nën hetim. Policia dhe mjekësia ligjore po kryejnë procedurat përkatëse për të zbardhur shkakun e vdekjes.

Victoria Jones ka pasur eksperienca të hershme në aktrim dhe është shfaqur shpesh në evente të rëndësishme kinematografike përkrah të atit, përfshirë premiera filmash në New York dhe Los Angeles. Autoritetet pritet të japin më shumë detaje pas përfundimit të ekzaminimit mjeko-ligjor.