Antigona Ramosaj, nëna e këngëtares së njohur Beatrix Ramosaj, ka ndarë publikisht për herë të parë betejën e saj me kancerin, duke prekur me mesazhin e sinqertë mijëra ndjekës në rrjetet sociale.

Përmes një reagimi emocional, ajo bëri të ditur se ka përfunduar ciklin e parë të kimioterapisë. Antigona shprehet se, ndonëse ndihet e lodhur fizikisht, zemra e saj është e mbushur me mirënjohje për mbështetjen e madhe që ka marrë nga familjarë, miq dhe njerëz që i kanë qëndruar pranë me mesazhe, lutje dhe fjalë inkurajuese.

“Po kaloj një nga betejat më të vështira të jetës sime”, shkruan ajo, duke theksuar se vendimi për ta bërë publike këtë përvojë nuk ka qenë i lehtë. Sipas saj, arsyeja kryesore është ndërgjegjësimi i vajzave dhe grave që të mos neglizhojnë kontrollet mjekësore, edhe kur shqetësimet duken të vogla apo të parëndësishme.

Reagimi i Antigona Ramosajt u shoqërua menjëherë me një mesazh prekës nga vajza e saj, këngëtarja Beatrix Ramosaj. Artistja e përshkroi nënën si heroinën dhe forcën më të madhe të jetës së saj, duke vlerësuar qëndrueshmërinë dhe shpirtin luftarak të saj edhe në momentet më të vështira.

“Edhe kur dhimbja mundohet ta rrëzojë, ajo zgjedh të buzëqeshë”, shkruan Beatrix, duke shtuar se forca e nënës së saj është më e madhe se çdo stuhi. Rrëfimi i Antigona Ramosajt ka marrë mbështetje të gjerë publike, duke u kthyer në një mesazh force, shprese dhe ndërgjegjësimi për shëndetin.