Liderja e opozitës venezueliane, Maria Corina Machado, ka reaguar pas zhvillimeve të fundit politike në Venezuelë, duke deklaruar se vendi ndodhet në një moment vendimtar për rikthimin e rendit kushtetues dhe demokracisë.

Në një deklaratë publike, Machado u shpreh se synimi i saj është rivendosja e rendit demokratik dhe lirimi i të gjithë të burgosurve politikë.
“Do të sjell rend dhe demokraci, do të liroj të burgosurit politikë. Ky është momenti për qytetarët”, deklaroi ajo.

Ajo theksoi se ky moment u përket të gjithë atyre që, sipas saj, rrezikuan gjithçka për demokracinë në zgjedhjet e 28 korrikut.
“Ata prej nesh që rrezikuan gjithçka për demokracinë më 28 korrik. Ata prej nesh që e zgjedhën Edmundo González Urrutia si president të ligjshëm të Venezuelës”, u shpreh Machado.

Më tej, liderja e opozitës kërkoi që González Urrutia të marrë menjëherë detyrën e tij kushtetuese, duke bërë thirrje për njohje institucionale dhe ushtarake.
“Ai duhet të marrë menjëherë detyrën e tij kushtetuese dhe të njihet nga të gjithë oficerët dhe ushtarët si Komandant Suprem i Forcave të Armatosura Kombëtare”, theksoi ajo.

Deklarata e Machados vjen në një klimë të tensionuar politike në Venezuelë, ndërsa vendi përballet me zhvillime të forta në planin e brendshëm dhe ndërkombëtar, që pritet të kenë ndikim të drejtpërdrejtë në të ardhmen e pushtetit dhe stabilitetit institucional.