Presidenti venezuelian Nicolas Maduro mund të paraqitet që të hënën përpara një gjykate federale në Manhattan, pas kapjes së tij nga autoritetet e Shteteve të Bashkuara. Lajmi është raportuar nga Fox News, duke cituar burime pranë hetimit.

Më herët, Prokurorja e Përgjithshme e SHBA-së, Pam Bondi, konfirmoi se Maduro dhe bashkëshortja e tij janë tashmë të paditur në Distriktin Jugor të Nju Jorkut, një nga juridiksionet më të rëndësishme federale në SHBA për çështjet e krimit të organizuar dhe trafikut ndërkombëtar të drogës.

Në një deklaratë publike të bërë të shtunën, Bondi u zotua se presidenti venezuelian dhe bashkëshortja e tij do të përballen me, siç u shpreh ajo, “të gjithë furinë e drejtësisë amerikane, në tokën amerikane dhe në gjykatat amerikane”.

“Në emër të Departamentit të Drejtësisë, dua të falënderoj Presidentin Donald Trump për kurajon që tregoi duke kërkuar llogaridhënie në emër të popullit amerikan, si dhe një falënderim të veçantë për të gjithë ushtarakët që përfunduan këtë mision të jashtëzakonshëm dhe të suksesshëm për kapjen e këtyre narko-trafikantëve të dyshuar ndërkombëtarë,” deklaroi Bondi në platformën X.

Detajet mbi akuzat konkrete, masat e sigurisë dhe procedurat ligjore që pritet të ndiqen në seancën e parë gjyqësore nuk janë bërë ende publike, ndërsa autoritetet amerikane pritet të japin më shumë informacion në orët dhe ditët në vijim.