Kina i ka bërë sërish thirrje Shteteve të Bashkuara që të lirojnë presidentin venezuelian Nicolás Maduro dhe bashkëshorten e tij, të cilët ndodhen në paraburgim në SHBA pas arrestimit të tyre nga forcat amerikane në Karakas.

Në një deklaratë zyrtare, Ministria e Jashtme e Kinës thekson se Uashingtoni duhet të garantojë sigurinë personale të presidentit venezuelian dhe të bashkëshortes së tij, duke kërkuar lirimin e menjëhershëm të tyre.

“Kina i bën thirrje SHBA-së të sigurojë sigurinë personale të Presidentit Maduro dhe gruas së tij, të lirojë menjëherë Presidentin Maduro dhe gruan e tij, të ndërpresë përpjekjet për të përmbysur regjimin venezuelian dhe ta zgjidhë çështjen përmes dialogut dhe negociatave”, thuhet në deklaratën e Pekinit.

Autoritetet kineze kanë shprehur më herët shqetësim të thellë për situatën në Venezuelë, duke dënuar ashpër atë që e cilësojnë si “përdorim të hapur të forcës nga Shtetet e Bashkuara kundër një shteti sovran”.

Reagimi i Kinës vjen në një moment tensionesh të larta ndërkombëtare, ndërsa zhvillimet e fundit në Venezuelë kanë ngjallur reagime të forta diplomatike dhe kanë rritur frikën për përshkallëzim të mëtejshëm të krizës në rajon.