Pas çdo ndryshimi të pronarit të një automjeti, do të kryhet kontroll teknik i detyrueshëm, pavarësisht nga data e kontrollit të fundit. Ky parashikim është përfshirë në një udhëzim të Ministrisë së Infrastrukturës dhe Energjisë, i cili është publikuar në Fletoren Zyrtare dhe do të hyjë në fuqi nga data 1 dhjetor 2026.

Sipas udhëzimit, autoriteti kompetent mund të kërkojë që mjeti t’i nënshtrohet kontrollit teknik përpara afatit periodik, në rastet kur ka ndryshuar titullari i certifikatës së regjistrimit. I njëjti detyrim mund të zbatohet edhe për automjetet që kanë përshkuar mbi 160 mijë kilometra.

Ndryshimet synojnë rritjen e sigurisë rrugore dhe përfshijnë gjithashtu rregulla të reja për shkëmbimin e informacionit me vendet e Bashkimit Evropian. Autoritetet shqiptare, nëse është e zbatueshme, do të përdorin platformën e Komisionit Evropian për shkëmbimin e të dhënave mbi certifikatat e kontrollit teknik dhe leximet e odometrit mes shteteve anëtare të BE-së.

Po ashtu, inspektorët e qendrave të kontrollit teknik, pronarët e mjeteve dhe studiuesit e aksidenteve do të kenë akses, kur është e mundur, në platforma të tjera elektronike të Komisionit Evropian. Këto platforma do të ofrojnë informacion mbi historikun e aksidenteve të automjeteve dhe të dhëna të tjera që lidhen me sigurinë e komponentëve të mjeteve të përfshira në aksidente.