Kryeministri Edi Rama mori pjesë në Samitin e Zhvillimit të Qëndrueshëm në Emiratet e Bashkuara Arabe, ku theksoi rëndësinë e pavarësisë energjetike të Shqipërisë dhe potencialin për të gjeneruar të ardhura nga eksporti i energjisë drejt Evropës.

Rama nënvizoi ambicien për një bashkëpunim tripalësh Shqipëri–Itali–Emiratet e Bashkuara Arabe: “Synimi ynë është të krijojmë një bazë të ngarkesës në Shqipëri. Dr. Sultan synon të arrijmë tre gigavat, dhe përmes kabllit ndërlidhës me Italinë, të furnizojmë Evropën me energji të gjelbër.” Ai shtoi se bashkëpunimi me partnerët arabë mund të sjellë fitime nga shitja e energjisë.

Duke folur për energjinë hidrike, Rama bëri batutën e tij karakteristike: “Mos harroni se energjia hidrike varet nga ‘humori i Allahut’. Kur Allahu qesh shumë dhe nuk bie shi, duhet të drejtohemi drejt importit, gjë që e bën situatën më të vështirë.”

Kryeministri gjithashtu vuri theksin te teknologjia dhe inteligjenca artificiale, duke prezantuar ‘Diella’, ministrja e parë në botë e krijuar nga inteligjenca artificiale, e cila po zhvillon një sistem të prokurimit publik dhe po përgatit transferimin e korpusit ligjor të BE-së për t’iu shërbyer qytetarëve me efikasitet më të lartë.

Rama ndau panelin me homologun malazez Miljoko Spajiç, duke komentuar me humor konkurrencën: “Ata janë 500 mijë, por duan të triumfojnë kundrejt 500 milionë investuesish.”

Gjatë samitit, Kryeministri u nderua me medaljen Sheik Zayed, e emëruar sipas themeluesit të Emirateve të Bashkuara Arabe, një njohje kjo për kontributin e tij në zhvillimin e projekteve të qëndrueshme energjetike dhe bashkëpunimin ndërkombëtar.