Grupi i avokatëve mbrojtës të ish-presidentit Ilir Meta, njëkohësisht kryetar i Partisë së Lirisë, i arrestuar dhe paraburgosur që nga 21 tetori 2024 dhe nën hetim për pasurinë, lobimin në SHBA dhe dosjen CEZ-DIA, dolën sot para mediave për të denoncuar standardet e dyfishta në hetimet dhe mbajtjen në paraburgim të klientit të tyre.
Mbrojtësi Gylsen Zhllima shpjegoi se në dosje nuk ka asnjë provë që e lidh Metën me akuzat e ngritura nga prokuroria, as për pasurinë dhe as për CEZ-DIA.
Ai shtoi se në asnjë pjesë të dosjes me 1706 faqe nuk përmendet lidhja direkte e Metës me biznesmenin Kastriot Ismaili, dhe sipas tij çështja është fryrë qëllimisht për të ngatërruar dhe lodhur avokatët.
“Janë 1706 faqe për rastin e borxheve të CEZ-DIA. Ka brenda emra që nuk kanë asnjë lidhje me zotin Meta. Nuk kanë as procedim penal dhe as hetim, thjesht janë aty për të thënë se ka volum dosja, për të na lodhur neve si mbrojtje. Por ne nuk jemi lodhur dhe e kemi gjetur bashkë me zotin Cakrani vendimin ndaj Kastriot Ismailit në Gjykatën e Lartë, ku nuk përmendet në asnjë vend dhe aq më tepër të akuzohet për korrupsion. Ky është korrupsion imagjinar, nuk ka asnjë provë. Thjesht bëhet një lidhje indirekte për njohje me të”, tha Zhllima.
