Specialistët e Hetimit të Krimeve në Gjirokastër referuan në Prokurori katër persona, të dyshuar për rrëmbim dhe dhunë ndaj një 30-vjeçareje brenda familjes.

Shtetasit A. A. (34 vjeç), S. A. (53 vjeç) dhe E. M. (51 vjeç) dyshohet se e rrëmbyen dhe e dhunuan motrën e 34-vjeçarit në banesën e këtij të fundit, ndërsa shtetasi L. L. (43 vjeç) dyshohet se kishte dijeni për ngjarjen dhe nuk e denoncoi atë në polici.

“Në Prokurori është nisur procedimi penal për shtetasit e përmendur, pasi dyshohet se si pasojë e një konflikti familjar, A. A., S. A. dhe E. M. kanë marrë me forcë 30-vjeçaren në automjet dhe më pas ajo është dhunuar në banesën e njërit prej tyre. Gjithashtu, shtetasi L. L. dyshohet se ka patur dijeni për ngjarjen dhe nuk ka kallëzuar rastin”, njofton Policia e Gjirokastrës.

Hetimet vijojnë për sqarimin e plotë të rrethanave të ngjarjes dhe për zbardhjen e përgjegjësive ligjore të të përfshirëve.