Sipas raporteve mediatike, studio të lidhura me kryebashkiakun e Tiranës, Erion Veliaj, paguan rreth 220 mijë dollarë për shkrime, raporte, e-maile dhe takime që synonin të sulmonin drejtësinë, veçanërisht SPAK-un. Objekt i sulmeve ishte prokurori Ols Dado, i cili së bashku me Altin Dumanin kishte hetuar dosjen e Veliajt.

Raporti rikthen një ngjarje të vitit 2011, kur përhapet një lajm në media mbi një rast të dhunës ndaj bashkëshortes së kryebashkiakut të Kavajës, e cila më vonë rezultoi një manipulim. Përmes e-maileve dhe raporteve, ngjarja u përdor për të krijuar presion ndaj institucioneve, një skemë që sipas raporteve, Veliaj po e përdor edhe sot për të lobuar në SHBA.

Sipas deklarimeve publike, personi që pagoi për lobimin është Arbër Veliaj, vëllai i kryebashkiakut, i cili është aktualisht nën hetim nga SPAK-u. Shumat, thuhet, vijnë kryesisht nga kompani që kanë marrë përfitime nga Bashkia e Tiranës, përfshirë kontrata reklamuese dhe përdorimin e pronave publike për evente të ndryshme.

Rritja e xhiros së kompanisë së vëllait të Veliajt, që nga themelimi i saj në vitin 2015, përbën pjesë të shqetësimeve mbi burimin e fondeve që përdoren për lobim ndërkombëtar. Sipas raportimeve, lobimi me 220 mijë dollarë në SHBA ka për qëllim të ndikojë tek Departamenti i Shtetit, Senati dhe institucione të tjera ndërkombëtare kundër SPAK-ut.