Zbardhet dëshmia e dhënë para prokurorëve të SPAK nga ish-drejtori i Përgjithshëm i Burgjeve, Agim Ismaili, një nga tre personat e akuzuar për përfshirje në çështjen e hakerimit të kompjuterëve të prokurorëve të Prokurorisë së Posaçme.

Në dosjen hetimore, Ismaili ka shpjeguar rrethanat se si informacionet e ndjeshme përfunduan në posedimin e tij. Sipas deklarimeve, materialet e hakeruara nga Arnold Rrokaj i janë përcjellë nga miku i tij Zambak Gjoni, ish-drejtor i Burgut të Vlorës.

Ismaili ka sqaruar se komunikimi mes tij dhe Gjonit zhvillohej kryesisht përmes aplikacionit WhatsApp, ku shkëmbenin biseda të zakonshme, lajme, komente dhe batuta. Ai ka treguar se një natë, gjatë një komunikimi rutinë, Gjoni i kishte dërguar një material, të cilin ai e kishte hapur teksa ishte duke punuar.

“E shpërndava sepse mendova se ishte një lajm që kishte dalë në media dhe nuk e mendova gjatë. Më pas e lexova dhe i hodha një sy. Materiali kishte të bënte me disa hetime ndaj shtetasit Damian Gjiknuri dhe nuk e kam diskutuar më me njerëz të tjerë”, ka deklaruar Ismaili para hetuesve.

Ai ka pranuar se ka pasur biseda me Gjonin lidhur me këtë material, por gjithçka e ka marrë si shaka, veçanërisht kur ky i fundit i kishte thënë se kishte “burime në SPAK”.

“E kam marrë me humor. Nuk më ka shkuar asnjëherë ndërmend dhe as e kam besuar që ai mund të kishte aksesuar apo korruptuar njerëz në SPAK për të marrë informacion”, është shprehur Ismaili.

Sipas tij, bindja e vetme ka qenë se materialet kishin qarkulluar më herët mes gazetarëve dhe më pas i ishin ridërguar atij, pa qenë në dijeni se bëhej fjalë për dokumente të siguruara në mënyrë të paligjshme.

Hetimet e SPAK për këtë çështje vijojnë, ndërsa dëshmitë e të akuzuarve po verifikohen në funksion të zbardhjes së plotë të skemës së dyshuar të hakerimit dhe shpërndarjes së të dhënave konfidenciale.