Kryeministri Edi Rama, në përmbyllje të një mbledhjeje maratonë me deputetët e Partisë Socialiste, theksoi rëndësinë e forcimit të shërbimit administrativ parlamentar për të përballuar sfidat e procesit të integrimit europian.

“Megjithëse administrata aktuale numëron numër të madh personash, barra kryesore e punës mbështetet tek një numër i vogël individësh,” tha Rama, duke nënvizuar nevojën për ekspertizë të dedikuar pranë komisioneve përkatëse për të siguruar mbështetje teknike dhe profesionale për skuadrën negociatore.

Në fjalimin e tij, Rama kritikoi ashpër opozitën, akuzuar për abuzim me procedurat parlamentare dhe pengim të punës së Kuvendit. “Mjaft me ‘Teatrin e Baltës’ të opozitës në Kuvend! Sjellja e tyre është një goditje psikologjike për qytetarët që na ndjekin në televizor,” deklaroi kryeministri.

Rama paralajmëroi ndërhyrje të menjëhershme për të sanksionuar çdo cënim të dinjitetit në sallën e Kuvendit dhe për të ndaluar “legalizimin e rrugaçërisë”, duke theksuar ndikimin negativ që sjelljet e tilla kanë tek qytetarët dhe të rinjtë.

Ai theksoi se për të garantuar një proces të suksesshëm integrimi në BE, Kuvendi ka nevojë për një mekanizëm funksional koordinimi me qeverinë dhe një administratë parlamentare më cilësore dhe të fokusuar.