Detaje të reja dalin nga dosja hetimore për arratisjen e Altin Ndocit nga spitali i Durrësit, ngjarje e ndodhur një javë më parë. Sipas të dhënave zyrtare, Ndoci është shoqëruar për vizita mjekësore plot pesë herë në periudhën tetor 2025 – janar 2026, një frekuencë e pazakontë krahasuar me vitet e mëparshme.
Hetimet tregojnë se nga këqyrja e kamerave të sigurisë është konstatuar një ndërveprim i dyshimtë mes kryeinfermierit Aulon Çuku dhe ish-drejtorit të IEVP Durrës Indrit Cërloj, për të cilët dyshohet se kanë abuzuar me detyrën.
Sipas Shërbimit të Kontrollit të Brendshëm në Sistemin e Burgjeve, shoqërimet e shpeshta në spital të të burgosurve me rrezikshmëri të lartë shoqërore dhe gjendje të mirë ekonomike dyshohet se kryhen për të mundësuar favore të ndryshme, kryesisht takime speciale, kundrejt ryshfetit për drejtuesit dhe personelin përkatës.
Në dosje thuhet se, duke marrë parasysh rritjen e ndjeshme të daljeve të Altin Ndocit në një periudhë të shkurtër dhe krahasimin me historikun e mëparshëm, ekziston dyshimi i arsyeshëm se vizitat mjekësore të planifikuara në Spitalin Rajonal Durrës gjatë periudhës tetor 2025 – janar 2026 kanë qenë fiktive.
Sipas të dhënave zyrtare:
• Gjatë periudhës 2020–2024, Ndoci është shoqëruar në spital 4 herë.
• Gjatë periudhës 08.10.2025 – 13.01.2026, është shoqëruar 5 herë, konkretisht:
• 08.10.2025 – Drejtor Ervis Dedej
• 24.10.2025 – Drejtor i komanduar Edmond Llabani
• 26.11.2025 – Drejtor Indrit Cërloj
• 18.12.2025 – Drejtor Indrit Cërloj
• 13.01.2026 – Drejtor Indrit Cërloj
Hetuesit theksojnë se për realizimin e një vizite në spital rajonal kërkohet dakordësia e të gjithë zinxhirit institucional, përfshirë sektorin e shëndetësisë, Policinë e Burgjeve dhe drejtorin e institucionit.
Një tjetër shkelje e rëndë e konstatuar është fakti se asnjë nga këto dalje nuk është pasqyruar në komunikatat ditore të aktivitetit të Drejtorisë së Përgjithshme të Burgjeve dhe nuk është informuar në asnjë rast Shërbimi i Kontrollit të Brendshëm.
Hetimet vijojnë për të dokumentuar përgjegjësitë penale dhe institucionale në një nga skandalet më të rënda të sistemit penitenciar të viteve të fundit.
