Apple po përgatitet për një hap të madh teknologjik me gjeneratën e ardhshme të iPhone-ve Pro. Sipas një raporti të ri nga burime të zinxhirit të furnizimit të publikuara nga ETNews, kompania planifikon të prezantojë panele të avancuara LTPO+ OLED me modelet iPhone 18 Pro dhe iPhone 18 Pro Max.

Panelet LTPO+ pritet të jenë më efikase nga ana e konsumit të energjisë krahasuar me teknologjinë aktuale, por risia kryesore lidhet me dizajnin. Raporti thekson se këto ekrane do t’i mundësojnë Apple që sensorin infra të kuq (IR) për Face ID ta vendosë pas ekranit, duke eliminuar nevojën për elementë të dukshëm në pjesën e përparme.

Sipas burimeve të afërta me projektin, Apple po shqyrton gjithashtu zhvendosjen e kamerës selfie nën ekran, pa kompromentuar cilësinë e fotografive dhe videove. Nëse kjo realizohet, iPhone 18 Pro mund të jetë modeli i parë me një ekran thuajse tërësisht pa ndërprerje vizuale.

Ky zhvillim do të ketë ndikim edhe në zinxhirin e furnizimit të Apple. Raporti sugjeron se BOE, prodhuesi kinez i paneleve, do të përjashtohet nga furnizimi për modelet Pro, pasi aktualisht vetëm Samsung dhe LG kanë kapacitetin për të prodhuar panele LTPO+ OLED. Megjithatë, BOE mund të vazhdojë të furnizojë ekranet për modelet jo-Pro të iPhone.

Në të njëjtin raport thuhet se Apple planifikon të përdorë panele LTPO+ edhe në MacBook Pro M6, i cili pritet të vijë me një ridizajnim të plotë, duke sinjalizuar një strategji më të gjerë për adoptimin e kësaj teknologjie në pajisjet premium të kompanisë.

Nëse këto plane realizohen, Apple mund të shënojë një nga ndryshimet më të mëdha në dizajnin e iPhone që prej prezantimit të Face ID.