Pas konfirmimit zyrtar nga Prokuroria e Përgjithshme se gjyqtarja e Gjykatës së Posaçme, Irena Gjoka, rezulton e dënuar në Greqi dhe se ky fakt është fshehur në formularët e vetëdeklarimit, Grupi Parlamentar i Partisë Demokratike i është drejtuar me një shkresë Këshillit të Lartë Gjyqësor (KLGJ) dhe Inspektorit të Lartë të Drejtësisë (ILD), duke kërkuar zbatimin e Kushtetutës dhe ligjit për largimin e saj nga detyra.
Në shkresën e firmosur nga kryetari i Grupit Parlamentar të PD, Gazment Bardhi, theksohet se konfirmimi i autoriteteve përgjegjëse e vendos gjyqtaren Irena Gjoka “në kushtet e papajtueshmërisë me funksionin kushtetues të gjyqtarit”, sipas nenit 6/1 të Kushtetutës, ligjit nr. 95/2016 dhe ligjit nr. 96/2016. Opozita nënvizon se mosdeklarimi i dënimit penal dhe i urdhër-dëbimeve përbën edhe një tjetër vepër penale, duke krijuar, sipas saj, “një gjendje paligjshmërie dhe antikushtetutshmërie në sistemin gjyqësor”.
Deputetët e opozitës shprehin shqetësim të thellë për mosveprimin në kohë të KLGJ-së dhe ILD-së, duke paralajmëruar pasoja të rënda dhe të parikuperueshme për sistemin e drejtësisë. Në shkresë thuhet se, bazuar në konfirmimin zyrtar të Prokurorit të Përgjithshëm, fakti që gjyqtarja ka një vendim penal të formës së prerë dhe e ka mbajtur të fshehur këtë të dhënë, e vendos atë jo vetëm përballë përgjegjësisë penale, por edhe në “pamundësi kushtetuese dhe ligjore për të ushtruar funksionin e gjyqtarit të Republikës”.
Sipas PD-së, KLGJ duhet të kishte konstatuar mbarimin e statusit të magjistratit ose ILD të kishte kërkuar shkarkimin për “sjellje që diskreditojnë rëndë figurën e gjyqtarit”, jo më vonë se dy javë nga marrja e njoftimit për shkakun e papajtueshmërisë. Megjithatë, theksohet se këto institucione nuk kanë vepruar, pavarësisht se Prokurori i Përgjithshëm ka deklaruar publikisht prej muajsh se dënimi ishte konfirmuar nga autoritetet greke.
Në përfundim, opozita kërkon ndërhyrje të menjëhershme nga KLGJ dhe ILD për të zbatuar detyrimin kushtetues dhe ligjor për konstatimin e mbarimit të statusit të magjistratit për gjyqtaren Irena Gjoka, duke paralajmëruar se çdo vonesë do të dëmtojë rëndë interesin publik, besimin e qytetarëve te drejtësia dhe interesat financiare të shtetit shqiptar.
