Një finale historike për tensionin dhe polemikat ka shënuar Kupën e Kombeve të Afrikës, teksa Senegal dhe Marok u përballën në një përballje që është cilësuar si “ndeshja e turpit”.

Lojtarët dhe tifozët përjetuan momente kaosi në minutat e fundit të takimit. Një gol i Senegalit u anulua në minutën e 92-të, ndërsa arbitri akordoi një penallti për Marokun në minutën e 98-të, duke ndezur protestat e fuqishme të kampionëve në fuqi. Trajneri i Senegalit, Pape Thiaë, urdhëroi lojtarët të largoheshin nga fusha, çka shkaktoi tension të madh mes tifozëve dhe forcave të sigurisë.

Sadio Mané ndërhyri personalisht për t’i bindur shokët e skuadrës të riktheheshin, dhe penalltia u ekzekutua pa sukses nga Brahim Diaz. Në kohën shtesë, Senegali shënoi golin vendimtar, duke fituar 1-0 trofeun, por tensioni nuk u ndal. Në konferencën për shtyp pas ndeshjes, përplasjet verbale mes gazetarëve senegalezë dhe marokenë e bënë të pamundur mbylljen e saj.

Trajneri Thiaë kërkoi falje më vonë për veprimin e tij: “Me gjakftohtësi e kuptoj që nuk ishte veprimi i duhur t’i tërhiqja lojtarët nga fusha. I kërkoj ndjesë futbollit. Gabimet e arbitrit ndodhin dhe duhen pranuar. Nuk duhej të vepronim ashtu, ndaj kërkoj sërish falje.”

Finalja Senegal–Marok mbetet një nga më kontroverset në historinë e Kupës së Kombeve të Afrikës, duke ngritur pyetje mbi vendimet arbitrare dhe menaxhimin e krizave në futbollin afrikan.