Policia e Korçës ka finalizuar një operacion të gjerë kundër lojërave të fatit të paligjshme dhe shpërndarjes së lëndëve narkotike, duke arrestuar pronarin e një lokali në fshatin Bulgarec.

Në pranga ka rënë shtetasi A. R., 57 vjeç, i cili sipas policisë organizonte lojëra fati dhe shpërndante lëndë narkotike të llojit kokainë brenda ambientit të lokalit të tij. Gjatë kontrollit, uniformat blu konstatuan se lokali ishte përshtatur posaçërisht për zhvillimin e bixhozit të paligjshëm dhe përdorimin e drogës.

Nga kontrollet në ambientet e lokalit u sekuestruan 14 doza me lëndë të dyshuar kokainë, ndërsa nga këqyrja e telefonit celular të 57-vjeçarit u zbuluan faqe aktive për baste sportive online.

Gjatë ndërhyrjes së policisë, disa persona të pranishëm në lokal tentuan të fshihnin provat. Për këtë arsye, ka nisur procedimi penal për veprën “Veprime që pengojnë zbulimin e së vërtetës” ndaj shtetasve R. K., F. A., banues në fshatin Vinçan, Korçë dhe H. M., banues në fshatin Vloçisht, Maliq.

Po ashtu, procedimi penal për veprën “Moskallëzimi i krimit” ka nisur ndaj 14 shtetasve të tjerë, të cilët, megjithëse kishin dijeni për veprimtarinë e paligjshme, nuk e kishin denoncuar atë në polici.

Në ambientet e lokalit ndodhej edhe një punonjës policie, shtetasi D. L., me detyrë pranë PKK Kapshticë, ndaj të cilit ka nisur procedimi penal për veprën “Shpërdorimi i detyrës”. Paralelisht, ndaj tij ka filluar edhe hetimi disiplinor nga Drejtoria e Standardeve Profesionale në Policinë e Shtetit.

Gjatë operacionit u sekuestruan gjithashtu shuma monetare në lekë dhe valuta të huaja, një automjet, 8 aparate celularë, si dhe letra bixhozi dhe çipsa që përdoreshin për lojërat e fatit.

Materialet procedurale i janë referuar Prokurorisë së Korçës për veprime të mëtejshme ligjore.