Të paktën një person ka humbur jetën dhe 27 të tjerë janë plagosur si pasojë e sulmeve intensive ruse gjatë natës në Kiev dhe Kharkiv, kanë bërë të ditur autoritetet ukrainase.

Në të gjithë territorin e Ukrainës është shpallur gjendje gatishmërie, ndërsa në kryeqytet autoritetet ushtarake kanë paralajmëruar për kërcënim të vazhdueshëm nga sulmet me dronë dhe raketa balistike.

Në Kiev, dëme janë regjistruar në pesë lagje të ndryshme. Kryetari i bashkisë, Vitali Klitschko, përmes një postimi në Telegram konfirmoi se “një person ka ndërruar jetë dhe katër të tjerë janë plagosur, tre prej të cilëve janë shtruar në spital”.

Ai bëri me dije gjithashtu se si pasojë e goditjeve janë shkaktuar ndërprerje të furnizimit me ngrohje dhe ujë në disa zona periferike të kryeqytetit, duke rënduar situatën për banorët, veçanërisht në kushtet e motit të ftohtë.

Sulmet kanë goditur edhe qytetin e Kharkivit, ku autoritetet raportojnë për të plagosur dhe dëme në infrastrukturë civile, ndërsa ekipet e emergjencës vijojnë punën për vlerësimin e plotë të pasojave.

Autoritetet ukrainase kanë u bërë thirrje qytetarëve të qëndrojnë në strehime dhe të ndjekin udhëzimet e mbrojtjes civile, ndërsa situata e sigurisë mbetet e tensionuar.