Gjykata Themelore në Prizren ka zhvilluar katër seanca dëgjimore lidhur me kërkesat e Prokurorisë Themelore për caktimin e masës së paraburgimit ndaj 23 të pandehurve, të dyshuar për vepra penale kundër të drejtës së votimit, kanosje, marrje dhe dhënie ryshfeti.

Sipas njoftimit zyrtar, gjyqtarët e procedurës paraprake kanë vendosur masën e paraburgimit njëmujor për 21 të pandehur, kryesisht në cilësinë e komisionerëve, për shkak të dyshimit të bazuar për kryerjen e veprës penale “Falsifikimi i rezultateve të votimit”. Masa e paraburgimit mund të zgjasë deri më 23 shkurt 2026.

Po ashtu, ndaj një të pandehure është caktuar paraburgimi njëmujor për dyshime për falsifikim të rezultateve të votimit, ndërsa ndaj një të pandehuri tjetër, në cilësinë e vëzhguesit, është caktuar e njëjta masë për veprat penale “Kanosja” dhe “Dhënia e ryshfetit”.

Gjykata thekson se vlerësimi përfundimtar i fakteve dhe përgjegjësive penale do të bëhet në fazat e mëtejme të procedurës. Hetimet vijojnë, ndërsa autoritetet nënvizojnë rëndësinë e mbrojtjes së integritetit të procesit zgjedhor.