Policia e Kosovës ka gjetur dhe sekuestruar 140 kilogramë eksplozivë gjatë një kontrolli të realizuar dje në veri të vendit. Sipas autoriteteve, materiali shpërthyes është i prodhuar në Serbi.

Lidhur me rastin, në emisionin Info Magazine ka folur shefi i Planifikimit në Operativën e Policisë në veri, Erduan Baliqi, i cili bëri të ditur se eksplozivi mban shenjën e prodhimit të vitit 2014.
“Eksplozivi përmban tiketën që është i vitit të prodhimit 2014. Më tutje nuk mund të flasim më shumë rreth kësaj çështjeje”, deklaroi Baliqi në Klan Kosova.

Ai theksoi se kohët e fundit është rritur ndjeshëm bashkëpunimi i qytetarëve me policinë në veri të vendit, veçanërisht në raportimin e rasteve që lidhen me armë dhe mjete të rrezikshme.

“Andaj i ftojmë të gjithë qytetarët e Kosovës, pavarësisht etnisë, që çdo informacion që posedojnë për ndonjë mjet të rrezikshëm, armatim apo eksploziv, ta raportojnë tek ne. Policia do të ndërmarrë të gjitha masat e nevojshme”, u shpreh Baliqi.

Hetimet lidhur me rastin janë në vazhdim, ndërsa autoritetet nuk kanë dhënë ende detaje për persona të dyshuar apo arrestime.