Një paradoks i paprecedent shoqëron përpjekjet e Shqipërisë kundër korrupsionit: Diella, ministrja e inteligjencës artificiale krijuar për të simbolizuar transparencën dhe luftën ndaj abuzimeve, është përfshirë indirekt në një hetim penal që prek institucionin që e ka krijuar, duke ngritur pyetje serioze mbi besueshmërinë e reformave dhe integritetin e institucioneve publike, raportojnë New York Times dhe gazeta franceze Libération.

Ekzekutivët e Agjencisë Kombëtare të Shoqërisë së Informacionit, që menaxhon edhe ministren virtuale Diella, janë nën hetim për lidhje të dyshuara me një organizatë kriminale, e akuzuar për manipulimin e prokurimeve publike. Sipas prokurorisë, të dyshuarit mund të jenë pjesë e një “grupi të strukturuar kriminal” përgjegjës për konkurencë të padrejtë dhe privim të paligjshëm të lirisë në dhënien e kontratave publike.

Diella, e prezantuar zyrtarisht në shtator 2025 si “Ministre e Prokurimit Publik”, ishte menduar si fytyra e luftës së qeverisë ndaj korrupsionit, duke garantuar transparencë dhe duke ndihmuar qytetarët në marrëdhëniet me shërbimet publike. Megjithatë, hetimi ndaj krijuesve të saj ka sjellë tronditje mbi imazhin e reformave qeveritare dhe integritetin e institucionit që ajo përfaqëson.

Kryeministri Edi Rama, i cituar nga The New York Times, theksoi nevojën për pavarësi dhe profesionalizëm të institucionit, duke nënvizuar se duhet pritur zhvillimi i hetimeve. Ekspertët europianë paralajmërojnë se, pavarësisht disa përparimeve të shënuara, korrupsioni mbetet ende i përhapur gjerësisht në vend, ndërsa lufta kundër tij mbetet një kusht kyç për integrimin e Shqipërisë në Bashkimin Evropian.

Ky rast ka kthyer vëmendjen jo vetëm të publikut shqiptar, por edhe të komunitetit ndërkombëtar, duke theksuar sfidat e mëdha që vendi përballet në ndërtimin e institucioneve të besueshme dhe të paanshme.