Deputeti i Partisë Demokratike, Belind Këlliçi, ka reaguar nga selia e PD-së pas vendimit të Gjykatës së Apelit të Posaçëm për Korrupsionin dhe Krimin e Organizuar, e cila vendosi zbutjen e masave të sigurisë për ish-zyrtarë të Bashkisë së Tiranës.

Në deklaratën e tij, Këlliçi e cilësoi vendimin si një goditje të rëndë ndaj drejtësisë, duke theksuar se pas muajsh protestash për denoncimin e abuzimeve me fondet publike, përgjegjësia penale u zbeh ndjeshëm.

“Sot Gjykata e Apelit vendosi kapakun, jo mbi krimin, por mbi drejtësinë,” u shpreh deputeti demokrat.

Ai kujtoi se për 44 javë me radhë opozita ka protestuar para Bashkisë së Tiranës, duke akuzuar drejtuesit e saj për vjedhje të parave publike. Sipas Këlliçit, vendimi i Apelit i mbylli këto çështje pa vendosur drejtësi reale.

“Drejtuesit e Bashkisë, përveç njërit, dolën nga salla të larë. Një dosje u varros me ceremoni, duke prodhuar sot një ‘Alqi Bllako të dytë’, të cilit iu ngarkua e gjithë pesha e një grabitjeje kolektive,” deklaroi ai.

Këlliçi akuzoi sistemin e drejtësisë për standarde të dyfishta dhe për mungesë vullneti për të çuar deri në fund hetimet ndaj përgjegjësve kryesorë, duke theksuar se kjo minon besimin e qytetarëve te drejtësia dhe shteti ligjor.