Pas dorëzimit në Kuvend të propozimit për ngritjen e komisionit të posaçëm për reformën territoriale, me qëllim vijimin e procesit, kreu i grupit parlamentar të Partisë Socialiste, Taulant Balla, i ka drejtuar një apel të fundit Partisë Demokratike.

Balla kërkoi që mbledhja e radhës së komisionit të thirret ditën e hënë, duke paralajmëruar se një bojkot i radhës nga opozita do të pasohet me ndërhyrje institucionale.
“Nëse opozita bojkoton edhe mbledhjen e ditës së hënë, atëherë në seancë do të vendosim mekanizmin zhbllokues. Reforma do të bëhet, doni apo s’doni ju,” u shpreh Balla.

Në propozimin e depozituar nga socialistët parashikohen ndryshime edhe në përbërjen e komisionit. Konkretisht, PS kërkon rritjen e numrit të anëtarëve të saj nga 8 në 9 deputetë, çka prish raportin e barazisë mes mazhorancës dhe opozitës në këtë strukturë.

Kjo lëvizje pritet të thellojë përplasjet politike mes palëve, ndërsa pjesëmarrja ose jo e PD-së në mbledhjen e së hënës shihet si vendimtare për vijimin e procesit të reformës territoriale.