Sfida e rezistencës në shtëpinë e “Big Brother VIP 5” ka sjellë tensione të forta dhe debate të ashpra mes banorëve, duke nxjerrë në pah përçarje dhe akuza të drejtpërdrejta mes grupeve.
Fitues i sfidës u shpall grupi jeshil, i përbërë nga Rogerti, Artani, Juela dhe Kristi. Grupi i parë që u eliminua ishte ai blu me Selin, Mirin, Gimbën, Gretën dhe Inën, ndërsa më pas humbi edhe grupi i verdhë me Angelon, Krusitën, Baby G dhe Stelinën.
Në fazën përfundimtare të sfidës, përballë grupit jeshil mbeti grupi i kuq, i përbërë nga Mali, Mateo, Brikena dhe Stenaldo. Pikërisht në këtë moment, Stenaldo vendosi të shkëpuste dorën nga Mateo, veprim që i dha automatikisht fitoren grupit jeshil dhe ndezi reagime të forta në shtëpi.
Pas përfundimit të sfidës, situata agravoi në një debat të ashpër mes Artanit dhe Mirit. Artani e akuzoi Mirin se nuk shfrytëzoi mundësinë për të ndihmuar Stelinën, të cilën ai e konsideron si motër, duke shtuar se një veprim i tillë mund të kishte ndryshuar balancat dhe të kishte vënë në rrezik Inën për eliminim.
Debati u shoqërua me tone të larta dhe ofendime reciproke, duke përfshirë akuza personale dhe përplasje verbale të drejtpërdrejta, që u dëgjuan edhe nga banorë të tjerë. Përplasja mes dy banorëve konfirmoi edhe një herë se konkurrenca në “Big Brother VIP 5” po hyn në një fazë gjithnjë e më të tensionuar, ku strategjia dhe aleancat po vihen vazhdimisht në provë.
