Deputeti i Partisë Demokratike, Edi Paloka, komentoi gjatë një interviste televizive protestën e 24 janarit, duke e cilësuar si një përballje të veçantë për shkak të pjesëmarrjes së shumicës së të rinjve mbështetës të PD, të cilët sipas tij shprehën zemërimin e tyre ndaj qeverisë.

Paloka theksoi se kjo është forma e protestës që opozita duhet të vijojë edhe më 10 shkurt. “Qëllimi kryesor i protestës e kemi deklaruar tashmë: është tregimi i forcës përmes pjesëmarrjes”, tha ai, duke shtuar se pjesëmarrësit treguan guxim dhe vendosmëri në një situatë ku, sipas tij, kryeministri Rama ndodhet “mes zjarreve” dhe nën presion të brendshëm dhe të jashtëm.

Deputeti akuzoi qeverinë për përdorim të panevojshëm të dhunës gjatë protestës, të cilën e përshkroi si shenjë frike dhe jo arrogance: “Përdorimi i dhunës në mënyrë të panevojshme ishte më shumë një tregues i frikës sesa i forcës dhe kjo lidhet me situatën ku është qeveria dhe vetë Rama sot.”

Paloka theksoi se opozita ka shtrirë dorën tek qytetarët, duke theksuar se betejat politike nuk janë vetëm të PD-së, por të gjithë shqiptarëve: “Kur ballafaqohen me problemet e përditshme, jeta është bërë e padurueshme dhe në këtë aspekt ju kemi shtrirë dorën. Protestat nuk bëhen për ne, për Berishën, apo për deputetët, bëhen për ju, ndaj duhet të vini në protestë.”

Ai vuri në dukje ndryshimin kryesor të protestës së fundit krahasuar me të shkuarat: pjesëmarrja aktive dhe guximi i të rinjve, të cilët sipas tij nuk u frikësuan dhe shprehën revoltën e tyre ndaj situatës aktuale politike. “Rama nuk njeh formë tjetër veç forcës. Forca tregohet jo vetëm me dhunë, por edhe kur flitet për revoltë. Pashë shpirtin dhe zemërimin tek të rinjtë, ai ishte kulmi i protestës,” përfundoi Paloka.