Një ngjarje e rëndë ka tronditur qytetin Leoben në Austri, ku një nënë dyshohet se ka vrarë fëmijën e saj 12-vjeçar. Lajmi raportohet nga mediat vendase, mes tyre edhe Heute dhe Kleine Zeitung.

Sipas informacioneve paraprake, shërbimet e emergjencës u njoftuan rreth orës 15:00 dhe ndërhynë menjëherë në një apartament pranë spitalit LKH Leoben. Në vendngjarje, ekipet e shpëtimit gjetën të miturin të plagosur rëndë. Pavarësisht përpjekjeve për t’i dhënë ndihmën e parë, 12-vjeçari nuk arriti të mbijetojë.

Mediat austriake bëjnë me dije se edhe nëna është gjetur e plagosur, ndërsa rrethanat e sakta të ngjarjes mbeten ende të paqarta. Hetimet janë marrë në dorë nga Zyra Provinciale e Policisë Kriminale, e cila ka dërguar në vendngjarje një ekip të posaçëm hetimor.

Autoritetet nuk kanë dhënë ende detaje të tjera lidhur me motivet e dyshuara apo nëse është kryer ndalim apo arrestim, ndërsa pritet që hetimet të hedhin më shumë dritë mbi këtë ngjarje tragjike që ka tronditur opinionin publik në Austri.