Kreu i Partisë Mundësia, Agron Shehaj, ka denoncuar publikisht mazhorancën për moszbatim të kërkesës së tij për interpelancë me zëvendëskryeministren Belinda Balluku. Sipas Shehajt, kërkesa e tij, e bërë që në korrik të vitit 2023, është injoruar prej dy vitesh, duke theksuar se kjo përbën shkelje të Kushtetutës.

Në një deklaratë para mediave, Shehaj u shpreh se neni 80 i Kushtetutës detyron kryeministrin dhe ministrat t’i përgjigjen interpelancave brenda tre javësh. Ai kritikoi mazhorancën për mbrojtjen e Ballukut dhe për mosveprimin ndaj asaj që e quajti “abuzim me paratë e shqiptarëve”.

Shehaj kërkoi ndërprerjen e mbrojtjes ndaj ministres dhe theksoi se vazhdimi i kësaj situate cenon besimin e qytetarëve dhe shkel premtimet e qeverisë për përdorimin e fondeve publike në mënyrë të drejtë. Ai u bëri thirrje deputetëve të vendosin për respektimin e ligjit dhe të ndërmarrin veprimet e nevojshme për të garantuar llogaridhënien e ministrisë.