Për të tretën ditë radhazi, banorët e fshatit Baks-Rrjoll në Velipojë kanë vijuar protestën kundër ndërtimit të një resorti turistik në zonë, duke paralajmëruar përshkallëzim të situatës me bllokim të rrugëve dhe një protestë para Prokurorisë së Posaçme (SPAK).

Banorët pretendojnë se projekti cenon pronat e tyre dhe rrezikon rreth 80 banesa, ndërsa akuzojnë institucionet shtetërore për mungesë reagimi. Në një prononcim për mediat, një prej protestuesve deklaroi se kundërshtimi nuk do të ndalet derisa çështja e pronësisë të marrë zgjidhje.

“Sot është dita e tretë dhe do të jetë edhe dita e 30-të e e 300-të. Kjo protestë do të jetë e pandalshme,” u shpreh ai, duke theksuar se banorët posedojnë dokumente ligjore dhe vendime gjykatash për tokat e tyre.

Protestuesi drejtoi akuza të forta ndaj qeverisë, duke përmendur me emër Kryeministrin Edi Rama dhe Ministren e Infrastrukturës, Belinda Balluku, për të cilën tha se “ka firmosur”. Ai akuzoi gjithashtu biznesmenin Bashkim Ulaj dhe një ish-zyrtar të quajtur Fatmir Shpellza, të cilët i konsideroi përgjegjës për situatën.

“Ne nuk jemi popull që kemi ardhur të zëmë tokat e tjetrit. Ne i kemi me letra, me vendime gjykatash dhe në proces ligjor,” deklaroi protestuesi, duke i bërë thirrje edhe kryetarit të Bashkisë Shkodër, Benet Beci, si dhe administratorit të Velipojës, që të interesohen për problemin e banorëve dhe të dalin në terren.

Banorët paralajmëruan se hapi i radhës do të jetë bllokimi i rrugës kryesore, ndërsa për ditën e nesërme kanë njoftuar një protestë para SPAK, ku kërkojnë të priten nga drejtuesit e institucionit.
“Do ta presin popullin e Rrjollit nga ora 11:00 te dera,” u shpreh protestuesi.

Në lidhje me praninë e forcave të shumta policore, banorët kërkuan që protesta të mos përballet me dhunë, duke theksuar se ajo është paqësore. Sipas tyre, një ditë më parë disa të rinj janë shoqëruar nga policia, çka ka shtuar tensionin në zonë.

Pavarësisht kësaj, protestuesit shprehen të vendosur se nuk do të tërhiqen, duke këmbëngulur se do të vijojnë kundërshtimet deri sa autoritetet të dëgjojnë zërin e tyre dhe të ofrojnë një zgjidhje për çështjen e pronësisë.