Zbulime të reja mbi marrëdhëniet e financuesit Jeffrey Epstein me figura të larta publike, përfshirë Dukën Andrew, kanë dalë në dritë pas publikimit të miliona dokumenteve nga autoritetet amerikane.

Sipas dosjeve, një balerinë, identiteti i së cilës nuk bëhet publik, ka kërkuar dëmshpërblim prej 250 mijë dollarësh, duke pretenduar se në vitin 2006 është detyruar të kryejë akte seksuale gjatë një feste në rezidencën e Epstein në Palm Beach, Florida. Ajo pohon se është shoqëruar me shofer në shtëpinë e Epstein dhe ka kërcyer përpara dhjetëra burrave, mes tyre edhe Duka Andrew.

Në një letër të datës 23 mars 2011, avokati i saj, William K. Vogeler, pretendon se Epstein ka shkelur një marrëveshje mirëbesimi, duke mos i paguar 10 mijë dollarët e premtuar për pjesëmarrjen në festë. Gruaja përshkruhet si balerinë e njohur në një klub striptizmi në Florida dhe si pjesë e një grupi grash që dyshohet se ishin ftuar me të njëjtën skemë pagesash.

Sipas pretendimeve, ajo ka vënë re në festë edhe vajza shumë të reja, disa prej të cilave, sipas saj, dukeshin të mitura. Më pas, balerina thotë se u çua në një dhomë gjumi ku Epstein e prezantoi me Dukën Andrew. Avokati pretendon se asaj iu kërkua të kryente marrëdhënie seksuale, gjë që ajo e kundërshtoi, duke theksuar se ishte punësuar vetëm për të kërcyer, por se ndaj saj u ushtrua presion.

Dokumentet përmendin edhe akuza të tjera. Në vitin 2019, një ish-balerinë tjetër deklaroi se kishte pasur marrëdhënie seksuale me Dukën Andrew në një festë në shtëpinë e Epstein në Nju Jork gjatë viteve 1990, duke pretenduar se Epstein siguronte gra sipas “preferencave” të tij.

Duka Andrew i ka mohuar vazhdimisht akuzat për përfshirje në aktivitete të paligjshme, ndërsa këto dokumente të reja pritet të shtojnë presionin publik dhe ligjor mbi figurat e përfshira në skandalin Epstein.