Shtetet e Bashkuara kanë bërë të qartë se nuk do të pranojnë kërkesën e Iranit për zhvendosjen e bisedimeve të planifikuara për të premten nga Stambolli në Oman dhe zhvillimin e tyre në formë ekskluzivisht dypalëshe.

Bisedimet SHBA–Iran ishin planifikuar të zhvilloheshin me pjesëmarrjen e vendeve të tjera të Lindjes së Mesme si vëzhgues. Irani kërkoi ndryshimin me arsyetimin se kjo do t’i lejonte të përqendroheshin vetëm te programi bërthamor, duke shmangur diskutimin për raketat dhe çështje të tjera që konsiderohen prioritet për Uashingtonin dhe vendet e rajonit.

Zyrtarët amerikanë shqyrtuan kërkesën, por vendosën ta refuzojnë: “U thamë se ose do të bëhet kështu, ose nuk do të bëhet fare, dhe ata u përgjigjën ‘atëherë asgjë’”, tha një zyrtar i lartë amerikan. SHBA-të janë të gatshme të takohen brenda kësaj ose javës tjetër, për të arritur një marrëveshje thelbësore, përndryshe disa po shqyrtojnë opsione të tjera, duke iu referuar kërcënimeve të përsëritura të Donald Trump për veprime ushtarake.

Ndërkohë, i dërguari special i Shtëpisë së Bardhë, Steve Witkoff, dhe Jared Kushner pritet të udhëtojnë drejt Katarit për bisedime lidhur me Iranin, pa zhvilluar takim me palën iraniane. Sekretari amerikan i Shtetit, Marco Rubio, konfirmoi se Teherani ka kundërshtuar planin e SHBA-së për bisedimet në Stamboll, duke lënë çështjen të hapur dhe duke nxitur shqetësime për vonesa në arritjen e një marrëveshjeje.