Pas më shumë se një muaji pa drejtues të emëruar, Policia Bashkiake e Vlorës ka një lider të ri. Taulant Kondi është zyrtarisht emëruar drejtor, duke zëvendësuar Engjëllush Avdulajn, i cili u largua më parë nga posti.

Procedura për drejtimin e Policisë Bashkiake u shpall nga Bashkia e Vlorës dhe përfshiu aplikime, intervista dhe vlerësim të dokumentacionit të kandidatëve. Pas përfundimit të procesit, Kondi u shpall fitues, duke sjellë me vete një eksperiencë të gjerë nga radhët e Policisë së Shtetit, ku ka mbajtur poste drejtuese, përfshirë atë të zëvendësdrejtorit të përgjithshëm të Antikontrabandës.

Sipas burimeve, javën e ardhshme ai do të prezantohet me stafin e Policisë Bashkiake dhe do të marrë detyrën zyrtarisht. Emërimi i Kondit vjen në një periudhë kur institucionit i priten sfida të reja në menaxhimin e rendit urban dhe zbatimin e rregullave në qytetin e Vlorës.