Në Uashington DC u zhvillua Forumi i Sigurisë me temë “Investimi 5% në Mbrojtje dhe Partneriteti me SHBA-në”, i organizuar nga kryetari i Partisë Republikane dhe deputeti shqiptar Fatmir Mediu, në bashkëpunim me kongresmenë amerikanë dhe përfaqësues të institucioneve ndërkombëtare.

Gjatë fjalës së tij, Mediu theksoi rëndësinë e një Evrope të fuqishme dhe të bashkuar brenda NATO-s. Ai deklaroi:
“NATO nuk është një marrëdhënie ku SHBA shpëton Evropën apo anasjelltas, por një aleancë e integruar, ku siguria e Evropës lidhet drejtpërdrejt me atë amerikane.”

Ai ripërsëriti mesazhet e Sekretarit të Përgjithshëm të NATO-s, Mark Rutte, për ndarjen e barrës brenda Aleancës dhe nevojën për rritjen e shpenzimeve dhe kapaciteteve ushtarake. “Evropa është e aftë të mbrohet, por vetëm nëse rrit shpejt shpenzimet për mbrojtjen dhe kapacitetet ushtarake,” tha Mediu.

Forumi trajtoi gjithashtu bashkëpunimin strategjik në Ballkan. Mediu u shpreh: “Ndërtimi i një bashkëpunimi politik dhe ushtarak i vendeve të NATO-s në Ballkan, përfshi dhe Kosovën, është domosdoshmëri.” Kongresmeni amerikan Keith Self mbështeti anëtarësimin e Kosovës në Aleancë, duke e cilësuar atë një “kontribut të rëndësishëm për sigurinë dhe stabilitetin rajonal.”

Mediu paralajmëroi gjithashtu sfidat që lidhen me korrupsionin dhe krimin e organizuar në rajon: “Korrupsioni dhe krimi i organizuar i lidhur me kartelet e drogës mbeten kërcënime serioze për Ballkanin dhe Shqipërinë.”

Në aktivitet morën pjesë dhjetra kongresmenë amerikanë, ushtarakë të lartë, eurodeputetë, deputetë nga vendet e Ballkanit dhe Gjermanisë, si dhe përfaqësues të Institutit Ndërkombëtar Republikan (IRI), duke e kthyer forumin në një platformë kyçe për dialog dhe bashkëpunim strategjik.

“Mesazhi i qartë i këtij forumi është se Evropa mund të mbrohet vetëm brenda NATO-s dhe me partneritet të ngushtë me SHBA,” përfundoi Mediu, duke nënvizuar rëndësinë e bashkëpunimit transatlantik.