Kryeministri i Shqipërisë, Edi Rama, pritet të udhëtojë të hënën drejt Brukselit, ku do të zhvillojë një takim me Presidentin e Këshillit Europian, Antonio Costa. Takimi konsiderohet i beftë dhe i palajmëruar më herët, duke ardhur në një moment të ndjeshëm për zhvillimet politike dhe institucionale në vend.

Burime politike bëjnë me dije se ky takim zhvillohet në sfondin e tensioneve të fundit që lidhen me hetimet e SPAK ndaj zëvendëskryeministres Belinda Balluku dhe situatën e krijuar pas refuzimit të mazhorancës për të dhënë autorizimin për arrestimin e saj. Paralelisht, vëmendja është përqendruar edhe te roli i Gjykatës Kushtetuese, e cila ende nuk ka marrë një vendim për çështjen në fjalë, duke ushqyer akuza për zvarritje të procesit.

Në qarqet politike po rritet perceptimi se institucionet europiane po shfaqin shqetësim për atë që konsiderohet si një ndryshim i qëndrimit të qeverisë shqiptare ndaj reformës në drejtësi. Për vite me radhë, Edi Rama është paraqitur në arenën ndërkombëtare si mbështetës i fortë i pavarësisë së drejtësisë, por zhvillimet e fundit, përfshirë çështjen Balluku dhe hetimet e lidhura me AKSHI-n, kanë ngritur pikëpyetje mbi këtë narrativë.

Takimi në Bruksel shihet si një sinjal se partnerët europianë po ndjekin nga afër situatën në Shqipëri, në një moment kur marrëdhënia mes politikës dhe drejtësisë po vihet sërish në provë. Ende nuk ka detaje zyrtare mbi axhendën e bisedimeve, por pritet që çështjet e shtetit ligjor dhe funksionimit të institucioneve të pavarura të jenë në fokus.