Pas rreth 11 orësh mbledhje, Gjykata Kushtetuese vendosi me votim të ndarë 4 me 4 mbi kërkesën e kryeministrit Edi Rama për shpalljen antikushtetuese të vendimit të GJKKO për pezullimin e zv/kryeministres Belinda Balluku.

Gazetarja Klodiana Lala njoftoi se, sipas ligjit, për të qenë në favor të palës ankimuese duhej një kuorum prej 5 votash, ndaj me votim të barabartë vendimi i Ramës rrëzohet dhe mbetet në fuqi vendimi i SPAK dhe GJKKO-së.

“Pas më shumë se 10 orësh, Kushtetuese del me vendim për kërkesën e kryeministrit Rama për shpalljen antikushtetues të vendimit të GJKKO për pezullimin e Ballukut… Në këtë mënyrë, Balluku mbetet e pezulluar nga detyra e ministres dhe zv/kryeministres,” tha Lala.

Vendimi i gjyqtarëve ishte i ndarë:
• Katër gjyqtarë argumentuan se SPAK dhe GJKKO duhet të kishin kërkuar leje nga Kuvendi për pezullimin e anëtarit të kabinetit qeveritar, duke përmendur imunitetin si deputete.
• Katër të tjerët e vlerësuan të ligjshëm vendimin e GJKKO-së, duke theksuar se masa e pezullimit prek vetëm funksionin si ministre dhe zv/kryeministre, jo mandatin e deputetes.

Lala shtoi se identiteti i gjyqtarëve për mënyrën e votimit nuk publikohet, duke theksuar se qëllimi kryesor i nenit 103, pika 3 të Kushtetutës është mbrojtja e organit ekzekutiv.

Ky vendim mban në fuqi pezullimin e Ballukut dhe i hap rrugë SPAK-ut për të vijuar procedurat për heqjen e imunitetit dhe hetimet për të.