Kreu i Partisë Demokratike, Sali Berisha, gjatë një takimi me demokratët në Kamëz, ka ngritur akuza të forta për investimin në rrugën Qukës–Qafë Pllocë, duke e cilësuar atë si një nga shembujt më flagrantë të abuzimit me fondet publike.

Sipas Berishës, loti i tretë i kësaj rruge, me gjatësi 9 kilometra, ka kushtuar 87 milionë euro, ose rreth 9 milionë euro për kilometër, pavarësisht se, sipas tij, nuk përfshin as ura dhe as tunele. Ai deklaroi se fondet janë vjedhur dhe plaçkitur “në mënyrë të pabesueshme”.

Berisha theksoi se kjo, sipas tij, është vetëm gjysma e problemit, pasi gjysma tjetër lidhet me shndërrimin e parave të krimit dhe drogës në vota, dhe më pas të votave në favore për krimin dhe ndërtimet.

Gjatë fjalës së tij, kreu i PD-së përmendi edhe atë që e quajti “karteli Troplin”, duke pretenduar se pas dhunimit të zgjedhjeve në Durrës, janë ndërtuar kulla dhe objekte të shumta, ndërsa sipas tij, rreth 30 mijë metra katrorë tokë ndërtimi janë përfituar nga individë të lidhur me këtë skemë.

Ai akuzoi gjithashtu se fondet e buxhetit përdoren për të deformuar procesin zgjedhor, duke shtuar se “një ushtri e tërë mobilizohet për të shkelmuar votën e qytetarëve”. Berisha solli si shembull edhe projektet e Unazës, për të cilat tha se çmimet janë rritur artificialisht dhe se një pjesë e parave, sipas tij, janë përdorur për të manipuluar opinionin publik përmes mediave.

Në përfundim, Berisha u shpreh se opozita ka kaluar sakrifica dhe lodhje të mëdha, por sipas tij, ndodhet tashmë “në kilometrin e fundit” të betejës politike.