Autoriteti Kombëtar i Ushqimit (AKU) njoftoi se gjatë një kontrolli të ushtruar në Tregun e Milotit, strukturat e DRAKU Lezhë konstatuan një individ që tregtonte mish derri pa certifikatë veterinare, pa vulë identifikimi dhe pa faturë tatimore, si dhe në kushte të papërshtatshme higjieno-sanitare.

Si masë e menjëhershme për mbrojtjen e shëndetit të konsumatorëve, AKU bllokoi dhe asgjësoi 75.8 kg mish derri, ndërsa ndaj subjektit përgjegjës u vendos gjobë administrative, në përputhje me legjislacionin në fuqi.

AKU thekson se kontrollet do të vijojnë në të gjithë territorin dhe u bën thirrje qytetarëve që të blejnë produkte ushqimore vetëm nga subjekte të licencuara, si dhe të denoncojnë çdo rast abuzimi ose shkeljeje në tregtimin e ushqimit, për të garantuar sigurinë ushqimore dhe mbrojtjen e shëndetit publik.