Qeveria çeke po shqyrton seriozisht ndalimin e përdorimit të mediave sociale nga fëmijët nën moshën 15 vjeç, mes shqetësimeve në rritje për ndikimin negativ të platformave online tek të rinjtë.

Sipas mediave lokale, kryeministri Andrej Babiš ka deklaruar se ekzekutivi po ndjek shembullin e Francës dhe po analizon mundësinë e një mase të tillë kufizuese. Ai theksoi se nevojiten veprime urgjente për mbrojtjen e fëmijëve nga dëmet që, sipas ekspertëve, shkakton përdorimi i rrjeteve sociale.

“Unë jam në favor të një ndalimi, sepse ekspertët që njoh thonë se është jashtëzakonisht i dëmshëm. Duhet të bëjmë diçka për të mbrojtur fëmijët tanë”, u shpreh Babiš.

Nga ana e tij, zëvendëskryeministri Karel Havlíček bëri të ditur se qeveria ka nisur tashmë konsultimet me ekspertë dhe operatorë të telekomunikacionit për mënyrën se si mund të zbatohet praktikisht një ndalim i tillë. Ai shtoi se legjislacioni përkatës mund të propozohet brenda këtij viti.

“Ne definitivisht nuk do ta zvarritim këtë. Nuk ka kohë për të humbur. Rrjetet sociale po shkatërrojnë jetën e fëmijëve; po fillon të bëhet një murtajë”, deklaroi Havlíček gjatë një debati në CNN Prima News.

Debati në Çeki zhvillohet në një kontekst më të gjerë ndërkombëtar, ku disa shtete kanë ndërmarrë hapa konkretë për të kufizuar aksesin e fëmijëve në mediat sociale. Australia ndaloi përdorimin e tyre për fëmijët nën 16 vjeç në dhjetor, ndërsa Franca miratoi muajin e kaluar një ligj që ndalon rrjetet sociale për fëmijët nën 15 vjeç.