Henrik Hoxha, i pandehur në dosjen “Plumbi i artë” në Gjykatën e Posaçme, rrëfeu të martën detaje nga atentati i dështuar ndaj biznesmenit Lulëzim Masha në janar 2022 në Tiranë.

Sipas Hoxhës, shënjestra e vërtetë kishte qenë djali i Mashës, por duke mos e gjetur, atentatori planifikoi të vriste biznesmenin në mënyrë që djali të dilte në ceremoninë mortore.

Porosia, sipas Hoxhës, kishte ardhur nga Nuredin Dumani: “Në fillim diskutuam për 150 mijë euro për vrasjen e djalit. Pastaj për Lulzim Mashën ramë dakord për 100 mijë euro,” deklaroi ai.

Hoxha tregoi se kishte vëzhguar për gati një vit lëvizjet e biznesmenit dhe se atentati ishte planifikuar pranë Liqenit Artificial. Ai kishte çuar Skerdi Tasin pranë vendit, por atentati dështoi pasi arma e Tasit ngeci dhe Mashës iu shkaktua vetëm një plagë.

Gjithashtu, Hoxha rrëfeu për një plan të dështuar për të vrarë Oti Kilën në Elbasan dhe për transportimin e Dumanit pas një atentati në aksin Peqin-Elbasan, duke përfshirë edhe detyrimin e mjekëve për të kryer trajtimin në shtëpi.

“Erdhi policia aty, nuk di se si. Pastaj Nuredini na shiti të gjithëve… kur e pyeta për ngjarjen, më tha: ishin 4 veta, 3 me maska, shoferi pa maskë ishte Talo Çela,” rrëfeu Hoxha.