Kryetari i Partisë Demokratike, Sali Berisha, gjatë një konference për media, hodhi akuza të forta ndaj qeverisë, duke e cilësuar protestën e djeshme të opozitës si pjesë e një skenari të përgatitur.

Sipas Berishës, në tubimin e opozitës nuk pati efektivë të lënduar, ndërsa tha se disa persona u përfshinë në manipulime duke përdorur gaz lotsjellës dhe duke dërguar policë të pretenduar të lënduar në ambulanca.

“Ervin Minerolli, Klevis Balliu i kanë keqtrajtuar dje, janë përpjekur t’i asfiksojnë me gaz në fytyrë, kanë dërguar Belind Këlliçin se ka nxitur dhunë, kur ai në kohën kur po mbahej protesta po drekon në Michigan. Kuptoni çfarë mashtruesish të neveritshëm janë. Gjithçka e kishin të parapërgatitur… Mbrëmë kam shkuar vetë te Trauma. Këta njoftuan se 7 policë janë te Trauma, asnjë i vetëm nuk ishte atje. Personeli mjekësor më njoftoi se kishin shkuar 5 policë pa asnjë problem, as nuk ishin regjistruar, madje ishin kthyer direkt. Gjithçka ishte skenar. Nuk kishin asnjë të gërvishtur. I dërguan në spital që të plotësonin skenarin,” deklaroi ai.