Vajza e ish-deputetit Mark Frroku, Mara Frroku, i është drejtuar redaksisë së Newsbomb.al me një deklaratë ku paraqet një tjetër këndvështrim mbi marrëdhëniet brenda familjes. Reagimi i saj vjen pas deklaratave publike të aktores Rudina Dembacaj, bashkëshortes së Frrokut, e cila është shprehur se fëmijët e tij i konsideron si të vetët.

Në mesazhin e saj, Mara thekson se realiteti, sipas saj, është ndryshe nga imazhi i harmonisë familjare i shfaqur në rrjetet sociale. Ajo shprehet se ndjen dhimbje kur dëgjon deklarata të tilla dhe nënvizon se prindëria, sipas saj, nuk provohet me fjalë, por me sjellje dhe përfshirje reale në jetën e fëmijëve.

“Prindëria nuk provohet me deklarata, por me sjellje. Nuk është humane të thuash ‘janë të mitë’ dhe njëkohësisht të ndash fëmijët nga i vetmi prind që kanë apo nga shtëpia e tyre. Familja mbahet me prani dhe përfshirje, jo me kontroll”, shprehet ajo në deklaratë.

Në fund të reagimit, ajo firmos me emrin Mara Hanvera Frroku, duke përdorur edhe emrin e nënës së saj. Mara, së bashku me Ertën dhe Nardin, janë fëmijët e Mark Frrokut.

Nga ana tjetër, Rudina Dembacaj ka ndarë shpesh në rrjetet sociale momente me fëmijët e bashkëshortit, duke deklaruar se i konsideron si fëmijët e saj. Deri më tani, nuk ka pasur një reagim publik nga aktorja lidhur me deklaratën e fundit.