Segmenti rrugor “Qafë Thore – Theth” është mbyllur për qarkullimin e automjeteve për shkak të rrezikut të lartë nga ortekët e dëborës, si pasojë e përkeqësimit të kushteve atmosferike.

Sipas njoftimit zyrtar, reshjet e dendura dhe moti i paqëndrueshëm kanë rritur ndjeshëm nivelin e rrezikshmërisë në këtë zonë malore. Vendimi është marrë pas analizës së riskut dhe komunikimit me inxhinierët e firmës kontraktore për mirëmbajtjen e rrugës, si edhe me Autoriteti Rrugor Shqiptar.

Autoritetet bëjnë të ditur se, për arsye sigurie, qarkullimi është ndaluar për të gjitha mjetet, përfshirë edhe borëpastrueset, pasi zona paraqet rrezik të lartë për kalim.

Ky segment do të qëndrojë i bllokuar deri në një njoftim të dytë.

Drejtuesve të mjeteve u kërkohet të respektojnë sinjalistikën rrugore, të shmangin këtë aks dhe të ndjekin njoftimet zyrtare për çdo përditësim të mëtejshëm.