Presidenti i SHBA-së, Donald Trump, vazhdon të shprehë interes për blerjen e Groenlandës, territor autonom i Danimarkës. Kështu u shpreh kryeministrja daneze, Mette Frederiksen, gjatë një debati publik në kuadër të Munich Security Conference.

“Fatkeqësisht, mendoj se dëshira e tij mbetet e njëjtë”, deklaroi Frederiksen, kur u pyet nëse Trump vazhdon ta konsiderojë Groenlandën si pjesë të mundshme të territorit amerikan.

Ajo theksoi se çështja nuk konsiderohet e mbyllur nga pala daneze. “Të gjithë na pyesin nëse mendojmë se ka mbaruar. Jo, nuk mendojmë se ka mbaruar kjo krizë”, u shpreh kryeministrja gjatë diskutimit mbi sigurinë në Arktik.

Edhe homologu i saj nga Groenlanda, Jens-Frederik Nielsen, foli për presionin amerikan, duke e cilësuar atë “të papranueshëm” për popullsinë e ishullit. Megjithatë, ai shtoi se janë ndërmarrë “disa hapa” që i konsideron “në drejtimin e duhur”.

Debati mbi Groenlandën rikthehet në vëmendje në një moment kur Arktiku po fiton rëndësi të shtuar gjeopolitike, për shkak të burimeve natyrore dhe pozicionit strategjik.