Ish-ambasadori britanik John Stewart Duncan ka reaguar pas një jave të deklaratave përmbyllëse në Dhomat e Specializuara në Hagë, duke vënë në pikëpyetje vlerësimin e prokurorisë për dëshminë e tij.

Në një postim në rrjetin social X, ai shkroi: “Një javë interesante në Dhomat e Specializuara. Pres me padurim të dëgjoj prokurorinë të shpjegojë se si informacioni shumë i detajuar që përmenda disa herë në dëshminë time përfaqëson ‘njohuri të pakta të realitetit në terren’.”

Duncan ka qenë dëshmitar i mbrojtjes në procesin “Thaçi dhe të tjerët”, ndërsa reagimi i tij vjen në kohën kur po zhvillohen seancat përfundimtare në Hagë.

Gjatë fjalës së saj përmbyllëse, kryeprokurorja Kimberly West kërkoi 45 vjet burgim për secilin prej të akuzuarve, duke e çuar totalin e dënimeve të kërkuara në 180 vjet.

Procesi po ndiqet me interes të lartë në Kosovë dhe rajon, ndërsa pritet vendimi i trupit gjykues në muajt në vijim.